حبكيات ... ( السيره أطوَّل م السنين ) ...
______________
محمود الحبكى
كأن الموت فرّاز
بينقِّي يختار مننا الناس العُزاز
الموت حقيقه وأمر واقع
مش كلام إنشا ومجاز
الموت يحوم
يقظه ونوم
جوَّانا في الخطوه
بنهرب منّه بيكون الملاذ
والشاطر اللي بيستعد
بفعلُه زيَّك يا حبيب
دايماً لفعل الخير مجيب
ضحكان بشوش
ولا عُمر يوم صعّرت خَد
قصَّرت يد
زعّلت حد
عارف بإن السيره أطوَّل م السنين
ف كتبتها بالمِسك يا ( محمد )
واللي إنت كُنت محوِّشه في قلوب حبايبك
سطَّروه
عطَّروه رحمات ونور
ح تعيش ( محمد ) في القلوب
والسيره ح تفوح م القبور
